فضفض مع روفى وجنة و موناليزا

أنا مش هى

2011-03-23T17:15:00.004+02:00

مشكلتى باختصار
أنا فتاة مخطوبة واكتشفت أن خطيبى ارتبط بيا مخصوص لأنى شبه أول حب فى حياته ولما واجهته قالى أنه فى الأول ارتبط بيا عشان شكلى شبهها لكن مع الوقت حبنى بجد.. طبعاً أنا مش مصدقاه.
وحالياً محتارة مابين آه أنى أكمل معاه لأنى ماشوفتش منه حاجة وحشة فى تصرفاته وأخلاقه.
ومابين لأ مش عايزة أكمل معاه لأنى مش هى اللى هو عايزها. وماقبلش أنى أكون بديل لحد.

شوروا عليا.. أعمل إيه؟؟.

قولى راجع ليه

2010-12-11T00:31:00.002+02:00

فكرة مدونتكم كتير حلوة وأتمنى انكم تساعدونى بآرائكم.
أنا فتاة فى العشرينات من عمرى تمت خطبتى منذ خمس سنوات لشاب كنت أعتقد أنه فارس أحلامى ولكن خيب ظنونى فيه ولم يكن كذلك فاضطررت إلى فسخ الخطبة بعدها بشهور قليلة وفاجئنى بزواجه السريع من أخرى فى أقل من شهر على فسخ خطبتنا وكم أثر هذا فى نفسيتى تأثير سئ لأحساسى أنه لم يحزن على فقدى وبعدها بشهور تمت خطبتى لآخر حاولت أن ابدأ حياتى معه وانسى ماسببه لى خطيبى الأول من جراح نفسية ولكن لأسباب لا أعلمها إلى الآن قام خطيبى الاخر بفسخ خطبتنا فى أقل من شهور وسمعت بأن خطيبى الأول هو من أفسد خطبتى الثانية ولا أعلم كيف ولكنى بدأت أصدق وخصوصا بعدما علمت بأن خطيبى الأول طلق زوجته سريعاً وكأنه كان يتزوجها ليكيدنى ثم عاد لى مجدداً بعد فسخ خطبتى الثانية يطلب أن نعود لبعض ثانية وكنت أنا فى هذا الوقت مدمرة نفسياً لأنى مفسوخ خطبتى مرتين فى أقل من سنتين ولأنى فى كل مرة ببقى عايزة أكمل للآخر لكن النهاية بتكون غصب عنى.. المهم على قد مافرحت برجوعه بس كنت خايفة لأنى لم أعد حمل أى جراح جديدة وطلبت منه مهلة للتفكير ولكنه كان يتعامل معى على اعتبار انى بدلع وبأن محصلش حاجة للجو اللى انا معيشة نفسى فيه.. طبعاً ده ضايقنى منه جدا وخلانى أقوله أنى مش عايزاه.. ماردش عليا وابتعد عنى شهور دون سابق انذار ومن غير حتى مايناقشنى وبعدها رجع تانى يمكن اكون من وجهة نظرة هدأت وفكرت بس انا كنت خلاص حسمت موقفى وقررت انى فعلا مش عايزة اكمل معاه بعت لى كتير ولما مارديتش عليه عرفنى انه هسيتنانى ومش هيتجوز غيرى.. المهم بعد سنتين ولا حس ولا خبر منه لقيته راجع لى تانى بيطلبنى من أهلى بس الجديد بقى أنه اتجوز للمرة التانية وطلق واللى عرفته وواجعنى اكتر انه كان متكلم على طليقته دى لما كان بيوعدنى انه مش هيتجوز غيرى.. حسيت قد ايه انه خاين وكذاب واختيارى فى البعد عنه كان فى محله.
سؤالى دلؤتى واللى هيجننى
هو راجع لى تانى ليه؟؟؟؟؟
محدش يقولى انه بيحبنى لانى استحالة أصدق حاجة زى كده.
أنا عايزة اعرف هو عايز منى إيه؟؟
ومحدش يقولى برضه اعملى وسوى لأنه اتقدم لأهلى وأهلى خلاص رفضوه ومفيش امكانية للرجوع أنا بس الفضول هيموتنى.
ياريت الرجال بالذات يقولولى هو راجع تانى ليه؟
لأنى حاسة بإهانة برجوعه.. حاسة أنه عايز يعرفنى انه اتجوز ويقدر طول الوقت يتجوز ويطلق وأنا قاعدة فى بيت أهلى وخصوصا وهو مطلع عليا كلام انى مابتجوزش عشان بحبه لكن طبعا الحقيقة ان لسه ماجاش النصيب.
حد يفسر لى شخصيته؟
أنا هتابع تعليقاتكم ومستنياها

شكرا موناليزا

عيون زوجتى

2010-04-01T17:08:00.002+02:00

أنا رجل متزوج من عدة سنوات ولدى طفلين. المشكلة التى أواجهها الآن لم أشعر بها إلا مؤخراً رغم وجودها من يوم معرفتى بزوجتى إلا أنى كنت أتغاضى دائماً. لكن أهلى من أول معرفتهم بها عن قرب بعد زواجى أكتشفوا ما أعانيه أنا الآن ولذلك قرروا أن يتجنبوا التواجد معها فى أى مكان.

المشكلة هى أن عينيها وحشة.

ماتعرفش حاجة عن اى حد إلا وتحصله مصيبة أو لو فيه موضوع ميسر مايكملش لدرجة أن أهلى وماقصدتش بأهلى أمى وأبويا واخواتى لأ ده انا بقصد خلاتى وولادهم وأزواجهم وعائلة أزواجهم وبقية العائلة لما بيكون عندهم مناسبة حلوة بيقولوها صراحة مش عايزين فلانة تيجى. فى الأول كنت بزعل منهم ومستغرب ليه واخدين منها موقف كده لكن مع مرور الوقت وجدت ان عينيها تصيبنى انا وولادى كمان.

يعنى لو عرفت اى حاجة عنى ماتكملش ولذلك ما بقتش أقولها حاجة غير لما خلاص ابقى واثق من انها هتكمل واقولها عشان تفرح معايا واروح تانى يوم استلم وظيفة جديدة مثلا الاقى صاحب الشركة حصله حاجة او الورق ضاع او اى حاجة على هذا المنوال.

حتى ولادى لو قالت ان حد فيهم مثلا بيحب يشرب الشربة كتير بعدها إستحالة يشربها تانى.

ولما راجعت تاريخ العيلة من يوم ما هى دخلت فيها لقيت ان حصل مصايب بعد ما بتعرف الحاجة مباشرة.

أنا مش عارف أعمل معاها إيه؟

انا عايزها تبقى طبيعية والغريب انها بتصلى وتقرأ قرآن لكن الحقد اللى جواها مالوش حدود.

ياترى فيه حد متخصص ممكن أروح له ويقولى أعمل معاها إيه؟

ياترى هى محتاجة تتعالج نفسيا؟ ولو كانت محتاجة أقولها فى وشها كده صراحة؟.

طب ولو قلت حتى انى هطلقها كده مش هكون بظلمها؟

أنا بجد محتار ومش عارف اعمل ايه؟

أفيدونى أفادكم الله.

شابه عجوز

2010-01-30T03:53:00.005+02:00

وصلتنا هذه الرساله على أميل المدونه و الحقيقه أنى أتأثرت جداا بها ..و ان كنت أنا أيضا لا أدرى مثل صاحبة المشكلة ان كانت مشكله أم فضفضه و لكنها فى الحالتين تستحق النشر و الحوار .. و أريد أن أشير ان حتى أسم البوست لم يكن لنا منه نصيب اذ أن صاحبة المشكله

جعلته عنوان رسالته التى أضعها كما هى أمامكم .. و أسأل الرحمن لها و لكل مهموم أن و أن يفك كربها و كرب كل مهموم و لمن نلجأ لغيره أحبائى و هو خير معين ..أرحم الراحمين .. لكننا بشر و نحتاج أحيانا للفضفضه .. فدعونا نفضفض معا ..

السلام عليكم

أنا فتاه فى الثالثه و العشرين من عمرى .. و لا أدرى من أين أبدأ حكايتى ما ستقرؤنه عنى ليس قصصا من قصص الحب و العشاق و لا حكايات الضياع التقليديه هو فقط حكاية بنت محطمة فاشله شاخت روحها و توقفت عن الحلم لصالح حياتها المزدحمه

أدرس فى كليه عمليه تستنزف قدر كبير من جهدى و لا أستطيع أن أحقق فيها نتيجه جيده و أعيش وحيده مع أخوتى الذين لا أمتلك غيرهم

و لا أزعم أننى اؤدى لهم حقهم الكامل على كأخت كبرى.. علاقاتى الأجتماعيه محدوده جدا و قد تعلمت أن لا أسمح لأحد أيا كان من الأقتراب من عالمى كثيرا ..لى أصحاب أقربهم الي لا يعرف شيئا عن جراحى السطحيه حتى

لا أحد يعرف ان أمى قد توفيت منذ ثمانى سنوات تاركه وراءها أربعة أطفال أصغرهم لم تكمل وقتها ثلاث سنوات

ماتت و دفنت فى بلد أخرى حيث كنا نعيش خارج مصر.. كانت وفاتها مفاجئه و صادمه أحرقتنى و جعلت من أبنه الرابعة عشر عجوزا

أبى كان رجلا حنونا و طيبا لكنه أذانى من حيث لا يعلم فقد طلب منى أن لا أظهر حزنى و ألمى و دمعى أمام أخوتى الصغار وأن أدعى أنها فقط فى المستشفى و قد استمر الحال كذلك لمده طويله حتى أستنتجت الصغيره الأمر بنفسها و حتى تعودت أنا الكتمان و تعودت الأحزان أن تستهلكنى دون صوت أو شكل

كنا نحن الخمسه لبعضنا كل شىء و تحملنا الكثير و الكثير طوال خمس سنوات حتى أتت اللحظه المدمره الثانيه حين سقط أبى أثر جلطه دماغيه مفاجئه توفى بعدها بيومين ليتركنا وحدنا مرة أخرى و يكون علينا أن نواجه العالم بدونه

لم نكن نعرف صله لنا بأهلنا فى مصرسوى ما نعرفه عنهم من والدينا بينما لم نرهم منذ سنين طويله و كان علينا أن نعود الى الأرض التى لا نعرفها و لا تعرفنا

كان التقاؤنا بكثير من أقاربنا عذابا حقيقيا لسبب بسيط هو أنهم لا يفهموننا و لا نفهمهم فضلا عن جفاء بعض منهم و قسوة أخرين

فى الوقت الحالى نعيش وحدنا بعد أن أنتقلنا من جوار أعمامى ذلك الأنتقال الذى أثارهم علينا و قاطعونا بسببه رغم سعينا للأتصال بهم دائما و الحفاظ على صلة الرحم

أخوتى كل منهم يتعامل مع الأمر بطريقته ما بين سعى أخى الى بذل أقصى جهده فى العمل الى جانب الدراسه لتوفير سبل العيش لبيتنا و بين لا مبالاة الأخت الوسطى بالهموم و الأعباء و تقديمها ما تستطيع لخدمة البيت و مساعدتى فى ادارته و بين أختى الصغره التى سبقت سنها

و لم تعد تنتمى لعالم الصغار و ما يصاحب ذلك من اثار نفسيه كثيره

أما أنا فكل يوم يمضى أحس بعجزى يكبر معى و جراحى تزداد أتساعا .. دائما تطرقنى الذكريات و دائما أكتمها عن من حولى من زملاء و معارف

حتى فى هذا العالم الأفتراضى برغم أمتلاكى لمدونه أكتب فيها بصوره غير منتظمه أبقى دائما فى الظل مهما كنت ظاهره

أنا أضحك كثيرا و أتبسم كثيرا و فى الخلفيه أتألم كثيرا

كانت هذه فضفضتى أليكم لا أدرى ان كان لديكم من نصيحة لى و لكن لدي رجاء و هو أن نعلم جميعا أن هناك كثيرون يسيرون بيننا لا نعلم من أمرهم شيئا ربما نلومهم و ربما نراهم بغير صورتهم و ربما يثيرون استغرابنا أو حتى اعجابنا و لكن تبقى الحقيقه شيئا أخر مغاير تماما

إحتياج

2010-01-11T01:36:00.002+02:00

جاء لى تعليق على موضوع "إحتياج " وطلب منى صاحب التعليق أن أنشر كلماته وفى نفس الوقت لا أظهر حسابه.

ولذلك أستنتجت أنه يريدنى أن أنشر رسالته هنا.

وأرجو منه إذا كان هذا غير ما يريد فليخبرنى حتى أحذفها ولكن هذا ما هدانى إليه تفكيرى بعد حيرتى وخصوصاً فى طلبه بألا أتتبع حسابه ولذلك لا أجد مكان ألبى به طلبه سوى مدونة الفضفضة لعل هذا يكون مقصده.

وسأنشرها كما هى وبدون إضافة أو حذف أى شئ.

السلام عليكم ورحمة الله وبركاته.

سيدتى

أعتذر إذا أزعجتك ولكن فكرة تلك المدونة التى تتناولون فيها مشاكل الحياة هى ما شجعنى للكتابة.

سيدتى

لقد أحببتها سيدتى حباً لا أستطيع أن أصفه إلا بقول أنها أصبحت كظل لى ...

ذات لى تعيش فى كيان منفصل...

سيدتى لم أؤمن يوماً بقوة ذلك المسمى بالحب إلا معها..

شعرت بصدق حبها وعمق مشاعرها...

شعرت وكأن الجمادات تذوب فرحاً لهذا الحب...

رغم إختلافنا حول أحد نقاط الحياة التى وضعتها الطبيعة أمامنا فكنا سرعان ما نختلف لنعود من جديد...

أعترف أننى كنت أحمقاً فى تناولى لتلك النقطة فى آخر مرة ولكنها كانت بتأثير الواقع...

ولكننى كنت أعاهدها بأننى لن أتخلى عنها...

لست أدرى ماذا أريد أن تفعليه إذ لم أذكر إلا بيانات مبهمة ولكنى أردت الحديث...

إذ كما سألتِ فى نهاية موضوعك ماهو أكتر شئ تحتاجه فسيكون هو الله إذ أنه الوحيد الذى يرى سرائرنا فيقبلنا رغم تكرار أخطائنا حين يعلم صدقنا...

أما من البشر فأنا أحتاجها بشدة ولا أرى إهانة لى فى ذلك حيث أنها كما أخبرتك هى ذاتى التى تسير فى كيان آخر

وياليتها تسمع أنشودة " زوجتى" لأحمد أبو خاطر.

إلى هنا وأرجوكِ نشر تلك الكلمات فى مدونتك لعل الله يشاء باجتماع فهو القادر.

صاحبتى وزوجها

2009-12-30T04:17:00.004+02:00

فى البداية أحب أشكر كل القائمين على المدونة لأنها فكرة رائعة.

ومن غير كلام كتير هدخل فى الموضوع على طول.

أنا فتاة من أسرة ملتزمة وتخرجت من الجامعة منذ سنتين ولى صديقة متزوجة فى بلد بعيدة عنى وهى أصلاً مش من نفس بلدى وعشان كده كان صعب نتبادل الزيارات. إلى أن تزوجت . إتصلت بى فى يوم وأخبرتنى بأنها هتيجى تزورنى ومعاها زوجها . رديت بأهلا وسهلاً وفى دماغى أن أكيد زوجها هيوصلها عندى وهيروح يقعد شوية فى أى مكان وبعدين يبقى ييجى ياخدها.

ده طبعا ماحصلش لأنه فضل قاعد معانا. وأنا لأنى خجولة بطبعى مابقتش مرتاحة لوجود رجل غريب أراه لأول مرة والمفروض أنى أرحب بيه. حتى والدتى كانت تيجى تقعد معانا شوية وترحب بيهم وتقوم . فصاحبتى أول مرة تيجى عندنا البيت وأهلى يشوفوها. ووالدى كان برضه ييجى يرحب شوية بيهم ويقوم.

(زوجها كان تقريبا هو اللى بيتكلم ولما يشوف والدى أو والدتى يسكت فده أعطاهم انطباع انه مش عايزهم يقعدوا معانا)

باختصار الوضع كان عندنا فى البيت غريب. وأنا عن نفسى ماكنتش مرتاحة.

المهم بقى هى كلمتنى من كام يوم ولمحت أنها ناوية تجيب زوجها وبنتها الصغيرة ويزورونى. فأنا طبعا رديت بـ أهلاً وسهلاً

ولكن بداخلى عايزة أقولها تيجيلى لوحدك على عينى وراسى لكن زوجك أنا مش ملزمة أقابله أو أضايفه.

مبعرفش أتكلم معاها وبتبقى القاعدة رسمى جدا. وهو مش فى دماغه وزيارته بتطول بمعنى الكلمة.

هو عادى أن صاحبتى تزورنى ومعاها زوجها؟

وحتى لو عادى أقولها إزاى ماتجيبيش زوجك معاكِ؟

قولولى بقى أعمل إيه؟

سهرانة لمين

2009-07-27T21:02:00.004+03:00

أنا شاب فى بداية العشرينات من عمرى. أحببت زميلة لى منذ المرحلة الثانوية. حينما رأيتها لأول مرة شعرت بألفة شديدة بيننا وبأننى أعرفها منذ زمن. تمنيت أن أتكلم معها وأن يدور بيننا أى حوار ممكن يحدث بين أى زميلين. ولكن هذا لم يحدث فلم أكن أدرى وقتها بماذا أقول ولذلك فقد أكتفيت بالنظرات وكان يكفينى أنها تبادلنى نفس هذه النظرات. وكنت أتابع أخبارها دائماً بطريق غير مباشر حيث أننى علمت فيما بعد بأنها الصديقة المقربة لابنة عمتى. ودخلنا كلية واحدة ولكننى رسبت فى العام الاول وهى نجحت ومع ذلك نجاحها جعلنى أنسى رسوبى وكان أكثر ماضايقنى أننا لن نكون معاً فى سنة واحدة يعنى إحتمال رؤيتى لها أصبح قليلاً جداً. - كل هذه الفترة لم أتحدث معها قط-. فيكفينى رؤيتها بالإضافة إلا إنى لم أكن أعلم كيف أتكلم معها ولا فى أى موضوع سأبدأ ومن ثم قررت أن أصارح ابنة عمتى لعلها تستطيع أن تصل بينى وبينها ومن ثم أعبر لها عن مشاعرى التى كتمتها طوال السنين الماضية. ولكن ابنة عمتى لم تفعل شئ سوى أن قالت لأختها وأمها وبقية العائلة الكريمة ولم تقول لحبيبتى شيئاً. مما أثار حنقى وغيظى وجعلنى لا أريد التحدث معها مرة اخرى ولكنى قررت بأن أصارح حبيبتى وليكن ما يكون. وبالفعل جبت رقم موبايلها وأتصلت بيها وأول ما سمعت صوتها مش عارف ايه اللى حصلى المهم أنى قفلت. وكانت للصدفة بنت عمتى معاها وشافت رقمى ووجدتها بتتصل بيا تقولى ماينفعش تتكلم مع صاحبتى أو تتصل بيها لأن كده منظرى وحش قدام صاحبتى . اتضايقت جداً من الموقف ده وإن حبيبتى بتقول كل حاجة لصاحبتها حتى لو رقم غريب رنلها!!. المهم كنت بكتفى أن ابعت لها رسالة من وقت لتانى وكلها رسايل عامة (تهنئة بعيد ميلادها, بنجاحها, قدوم رمضان.....)
ومع مرور الوقت كنت بتعلق بيها أكتر وبحس باليوم اللى هشوفها فيه من قبل حتى ما اشوفها وأول ما تشوفها عيونى تقولها احلى كلام وهى كمان كانت عينيها مستمعة جيدة.
ومع تكرار رسائلى وجدتها أخيراً تبعت لى رسالة وعايزة تعرف فيها أنا مين؟
لأنى طبعا ماكنتش بمضى المهم اتصلت بيها أخيراً وقلتلها اسمى ومش قادر أوصف مدى سعادتها لما عرفت أن أنا اللى كنت ببعت لها الرسايل واتكلمنا كلام عادى جداً واعتذرت لها لو كانت رسايلى بتضايقها وهى قالت لى انها كانت بتبقى سعيدة بيهم.
وبعد المكالمة دى رجعنا برضه للعادى بتاعنا نكتفى بالنظرات لما بنشوف بعض صدفة بس الجديد أنى ماعدتش ببعت رسايل عامة زى الاول وبقيت ابعت رسايل بأى حاجة أحب اقولهالها حتى لو كانت نكتة بايخة. وخلاص اتعودت أنها مش هترد وبعدين بعد إنتهائها من البكالوريوس حسيت انى خلاص كده ممكن ماعتش هشوفها كتير وأنها ممكن تتخطب فقررت إنى أتصل بيها وأصارحها بمشاعرى واسمع رأيها لقيتها مابتردش رغم أنى كنت قبل كده قلتلها أنا مش هتصل بيكِ ولا حتى هرن عليكِ غير لما يكون فيه حاجة ضرورية جداً بس هى ماكانتش بترد بعتلها رسايل كتير فحواهم انها تفتح عليا لانى عايزها ضرورى ولما لقيتها مصممة انها ماتردش بعتلها رسالة انى كده وصلنى ردك وانى بفرض نفسى عليكِ وانى دوست على كرامتى كتير علشانك و... و... و... المهم بعدها لقيتها هى اللى بتتصل مارديتش أفتح عليها واستنيت شوية وأنا اللى أتصلت وصارحتها بكل حاجة وانى عايز ارتبط بيها بس مش هينفع دلؤتى عشان ظروفى اللى أنتِ عارفاها قالتلى انها مقدرة ظروفى جدا بس نسيبها للنصيب قلتلها يعنى انتِ مش ممكن تستنينى قالتلى لو لينا نصيب فى بعض هبقى ليك. غير كده أنا مش هقدر أوعدك بحاجة.
ونهيت معاها وأنا قررت أنى خلاص أنساها لأن واضح أنها عايزة تتجوز أول حد يدق على بابها ومش مهم مشاعره ناحيتها.
وللأسف فى كل مرة برجع أضعف من الأول وبحن لها تانى وارجع لعوايدى وابعتلها فى رسايل عادية رغم أنها غيرت رقم تليفونها بعد مكالمتنا بفترة وطبعاً ما قالتليش بس أنا عرفته زى ما بعرف كل حاجة عنها.
الجديد بقى انها دلؤتى لما بتشوفنى صدفة كالعادة بتضع وشها فى الأرض. والأغرب بالنسبة لى أنها مع الناس ذوق جداً ولو حد عملها حاجة تشكره وأنا أى حاجة كنت بعملهالها مالقيش منها غير الصمت. نسيت أقول أن علاقتها ببنت عمتى مازالت قوية جدا وعلاقتى انا ببنت عمتى أسقطها من حساباتى ولو أنى اشعر أنها تريد أن نرجع كما كنا وخاصة أمام حبيبتى.
عايز اعرف حبيبتى حبتنى أصلاً ولا لأ ؟.
وتصرفاتها معايا دى معناها إيه؟؟؟
وإيه اللى المفروض أعمله تانى؟ سواء معاها أو مع نفسى؟.

محتار

2009-04-17T17:42:00.003+02:00

أنا شاب
من خلال متابعتى لاحدى المدونات لفت نظرى تفكير وشخصية صاحبتها ومن خلال مواضيعها وتعليقاتها عرفت انها مش مرتبطة وده أدانى أمل انى ممكن ارتبط بيها لانى لقيت فى شخصيتها تقريبا كل اللى بدور عليه حتى العمر والبلد نكاد نكون متقاربين جدا (يعنى مفيش مشكلة من الناحية دى)
المشكلة بقى أقولها ده ازاى؟
هى مش حاطة ايميل خاص بيها ممكن اكلمها عليه
ومش بحب الوسايط فى المواضيع دى
ومتهيألى مش هينفع اكلمها فى تعليق
اعمل ايه؟؟؟؟

الرضيع الضحية

2009-03-18T18:08:00.003+02:00

أنا شاب لى أخ أصغر منى وأخويا ربنا أكرمه ومعاه دلؤتى ولد عمره3 شهور. مراته بنت بسيطة مؤهل متوسط عمرها19 سنة. لما جينا نجوزه كنا عايزين واحده تعيش معاه وتتحمل ظروفه لانه لسه فى بداية حياته.وكمان تكون كويسة وتساعد أمى فى البيت لانها تعبت وكبرت ومافيش معاها بنات. اخترنا دى على الاساس ده. بنت ناس فقرا بس كويسين المفروض مؤدبة وجميلة
الجوازة عشان النصيب تمت فى نص ساعة. يادوب راح قعد عندهم خمس دقايق جت البنت شافها وشافته واتكلموا مع بعض كلمتين
ايه رأيك ياعروسة اتكسفت وسكتت وهو ايه رأيك ياعريس قال على البركة ونقرا الفاتحة وبعد كده يادوب شهرين وعملنا الفرح وكان فرح زى الفل
وقبل الفرح احنا اللى جبنا كل حاجة من الابرة للصاروخ زى مابيقولوا وهما ماجابوش اى حاجة غير شوية حلل واطباق وكوبايات وبس لا بوتجاز ولا تلاجة ولا اى حاجة
واحنا قلنا يمكن الظروف مش مساعدة وفيه عندهم حاجة ولا كده ومش لازم ندقق
وتم الفرح وبعد كده بحاجة بسيطة حصل حمل وكلنا فرحنا وقالت عاوزة اروح بيت ابويا اسلم عليهم وقد كان
راحت هى وعريسها وكانت شارطة عليه يبلبس البدلة كاملة وهى كانت على سنجة عشرة وماشيين فى الشارع متأنكجين ومبسوطين.
وراحوا قعدوا ساعتين ورجعوا. هى رجعت من هناك مفيش ساعتين وحصلها اجهاض وكانت تعبانة جدا
جت امها قالت اصل فلانة قابلتهم وعلانة سلمت عليهم. المهم ان اخويا بقى بيتشائم من المنطقة بتاعتهم.
بعدها بشهر حصل حمل تانىواتفق زوجها معاها لما يحب يمشيها هيمشيها فى حتة تانية غير الحتة بتاعة ابوها وهى وافقت على كده
واخيرا تم الانجاب بسلام بس هى كانت تعبانة اوى وقعدت فى عيادة الدكتورة كام يوم قا لامها مش عايز حد ييجى العيادة يسلم عليها لما تبقى تروح الكل يشرفنا فى البيت وانا اشيلهم على راسى من فوق.
طبعا اهلها زعلوا جدا وازاى يقول كده وابوها يقابلنى بالليل ويغلط وانا اعديها واقول معلش تلاقى الراجل زعلان برضه ومش مشكلة احنا اهل وماقلتش لحد طبعا على حواره معايا
المهم جالنا من كام يوم يتخانق وازاى بنتى ماتجيلناش انا صبرت عليك كتير وللصبر حدود هو انت مش راضى تجيبها ليه وزعق وخرب الدنيا اخويا قاله الوادممكن يتعب من البرد واول ماالجو يدفى هجيبها واجى
صمم وقال ابدا واحنا كلنا وافقنا وقلناله لازم توديها وخصوصا انه قال ان والدتها تعبانة ووداها فى اول الاسبوع واخد معاه زيارة محترمة لزوم الواجب يعنى
واتفق معاها انه هييجى ياخدها بالليل بعد ماهتقضى اليوم كله هناك واتصل بيها بعد العشا وقالها البسى وانا جاى اخدك دلؤتى قالتله حاضر انا هستناك بعدها بدقيقة اتصل ابوها وقاله بنتى مش هتيجى هى هتقعد هنا يومين تلاتة قاله معنديش ستات تبات بره البيت فكان رده انه قفل السكة فى وشه
طبعا الزوج اتغاظ جدا وراح قال لابوه ابوه كلم ابوها واتخانقوا مع بعض وقاله ابعت حد ياخد الولد
راح لها وقالها تعالى يابنت الناس اقعدى فى شقتك قالتله لا انا هقعد مع امى (طلعت امها كويسة جدا ومش تعبانة ولا حاجة) طيب هاتى الولد راحت عطياهاله بكل بساطة ولا كأنه ابنها
وبعد كده بعتنا ناس قريبنا ليهم فقالوا انهم عايزين يطلقوا بنتهم والولد خليه معاكم
ومن غير سبب معلوم لينا
بعد كده عرفت انه عليه فلوس لناس وعايز يبيع دهب بنته عشان يسدد اللى عليه والولد معانا بقى له 3ايام من غير امه وامى ست كبيرة وصحتها على قدها ومش قد مسئوية طفل رضيع تفضل سهرانه معاه طول الليل وبعد ماكان بيرضع طبيعى بندورله دلؤتى على لبن صناعى
واخويا محتار شوية يقول هطلقها لانه مش ناسى وقوفها قدام ابوها وتقوله انا مش جاية معاك وارميله ابنه و شوية يقول هى غلبانة وابوها هو اللى مسيطر عليها
وفعلا لما بعتنا ناس يكلموها تقول اه هرجع النهاردة وبعدها ابوها يتصل ويقول لا مش هترجع

انصحونى انصح اخويا بإيه وايه التصرف مع الناس دى

أسئلة من شاب حائر

2008-11-29T22:23:00.006+02:00

تحديث هام
ــــــــــــــــــــ
لمزيد من إيضاح فكرة هذه المدونة أنها تستقبل المشاكل الشخصية التى تأتى لها عبر إيميل المدونة ,rovy_gannah@yahoo.com ونقوم بطرحها (يعنى مجرد وسيط) لنحاول سوياً الوصول إلى حل يساعد صاحب المشكلة المطروحة من خلال تعليقاتكم المفيدة.
ولذلك رجاء أن تكون التعليقات خاصة بالمشكلة المطروحة فقط.
أما عن أصدقائنا الأعزاء واللذين يريدون مراسلاتنا فليتوجهوا إلى مدونة كل منا على حدة.

روفى (لقاء الأحبة).
http://rovy-mylife.blogspot.com/
جنة (جنة).
http://just4girls-only.blogspot.com/
موناليزا (أمة الله).
http://monaliza110.blogspot.com/

ويسعدنا استقبال مشاكلكم وتعليقاتكم
وفى انتظاركم دائماً.
روفى . جنة. موناليزا
أنا اتعرفت علي بنت حسيت بتقارب شديد جدا معاها وتوافق في كتير من الموضوعات بيني وبينها وخلال فترة معينة حسيت اني مش قادر أستغني عن الحديث معاها أو اللقاء بيها
ما كنتش عارف ان كان ده حب ولا لأ
لأن اللي كان محيرني هو نوع العلاقة ان كانت صداقة أخوية أم حب
وذات مرة أرسلت لها رسالة شديدة اللهجة جعلتها تبكي
ولكي أعتذر لها عن الرسالة بعثت لها بأخرى حتي تعلم مقدارها عندي
في النهاية علمت أنها تحبني كأخ لها
وظلت العلاقة علي هذا النحو
حتي صرحت لها أنني كنت ذات فترة ماضية من الزمان أحبها
أما الآن فهي صديقة أتعامل معها كأخت لي
فوجئت بها قد تعلقت بي عقليا (عقليا - وأقول عقليا لأنها كما تصف نفسها لي لا تعترف بشيء اسمه حب ولا مشاعر ولا احاسيس مطلقا ولكنها صارت مقتنعة بي لأن أفكارنا متقاربة جدا) بعد هذا التصريح مع أنني كنت قد صرفت نظري عن الموضوع تماما ما أريده الآن هو معرفة

1-هل كثرة الحديث مع شخص ما تولد شعورا بالألفة تجاهه بما يجعل أحد الطرفين يتعلق بالآخر أم أنه لا بد من وجود صفات جذبت أحدهما للآخر؟؟؟؟.

2- هل يمكنني أن أحب أحدا لم يبادلني منذ البداية الحب إلا بعدما صرحت له أي أنني أنا الذي لفت نظره؟؟؟؟؟.

3- كيف يؤلم الطرف الثاني هاجس أن يفقدني كأخ أو صديق ولم يستشعر من زيادة اهتمامي به مشاعري الحقيقية نحوه؟؟؟؟؟؟؟

4- هل الذي لا يشعر بالطرف الثاني (إلا بعد أن يصرح له بحبه) شخص جدير بأن يحب؟؟؟؟؟

5- هل حينما أبالغ في تقدير أحد ما يجعل هذا الشخص يتعلق بي لأنني أنا الذي أشعرته بذاته أم ينبغي أن يكون تعلقه بي نابعا عن اقتناع بي أنا.؟؟؟؟

مع ملاحظة ان الانسانة التي أتحدث عنها معتزة بنفسها للغاية فهي حينما تبكي يكون بكاؤها من أجل ذاتها وليس من أجل الطرف الآخر الذي يقدرها .

2008-10-21T14:43:00.013+02:00

اصدقائنا الاعزاء جاءت لنا بعض الرسائل عبر الاميل الخاص و لكنها لا ترقى الى كونها مشكله يمكن تناولها و لم يذكر احدهم مشكله صريحه يريد منا ان نساعده فى ايجاد حل لها ..

لذا والى ان تأتينا رساله تحمل مشكله صريحه وجدنا ان نعرض عليكم بعض المشاكل التى نسمع بها و تؤرق البعض هذه الايام وسنطلب منكم اختيارالمشكله التى ترونها اولى بالمناقشه من بين ما نعرضه او اذا كان لاحدكم رأى اخر او مشكله لم نلتفت لها فليخبرنا فى تعليقه ولكم جميعا جزيل الشكر ..

و المشاكل التى نراها من وجهة نظرنا هى كالاتى :

1 - مشكله مهاجمة النقاب و من ترتديه بصوره غير لائقه للمناقشه و لا للتحدث بها عن امرأة مسلمه وان اختلف البعض معها فى انه ليس بفرض و لكن يتبقى لها حريتها الشخصيه الواجب احترامها او حتى مناقشتها بصورة متحضره و واعيه .

2- مشكله تعرض بعض المدونين لتعليقات سخيفه و ربما مؤذيه للمشاعر و احيانا هى خادشه للحياء

3- مشكله صغارنا الذين يذهبون الى الكى جى و كلهم امل وفرحه و حب للمدرسه فنصدم بانهم لعدم خبرة من يتعاملون معهم بانهم قد ملوا المدرسه قبل انتهاء الاسبوع الاول و ربما كرهوها ..

4-مشكلة التعليم فى بلدنا و خصوصا الثانويه العامه و ايضا الجامعات الخاصه هل هى لنا ام علينا ..

5- مشكلة الحياء الذى اختفى تقريبا من بلادنا و المرؤه و شهامة الرجل المصرى و العربى ايضا التى قلت فى شوارع بلادنا حتى ان تهان الفتيات او يسرق احدهم او يحدث ما هو اعظم فى عز النهارو امام الماره ولا يتدخل احد لنجدة احد كيف ولما وصلنا لهذا ..

6- الدعوة من حين لآخر لانشاء إتحاد للمدونين وهل يمكن لهذا`الإتحاد أن يحد من حرية المدون وفى حال قيامه ما هى الأهداف التى يمكن أن يتبناها

هذه بعض النقاط التى يمكن أن نفتحها للنقاش وعليكم أن تختاروا ما ترون أن له الأولوية

------------------------------------------------------------------------------

ما زال الايميل موجود لاستقبال مشاكلكم

تحياتنا للجميع

موناليزا / جنه / روفى

لننصر ديننا

2008-08-17T12:35:00.006+03:00

الحمد لله والصلاة والسلام على خاتم رسله محمد صلى الله عليه وسلم

تحديث

كل عام وجميع زوار المدونة بخير

عيد سعيد

------------------------------------------------------------

نود فى البداية أن نشكر الأخت صاحبة الرسالة ونحيي فيها غيرتها على الإسلام و ما لمسناه فيها من الرغبة فى عمل إيجابى و نشكر كل من تفضل بالتعليق على الموضوع

التدوين أصبح رافدا هاما من روافد التعبير وبدأ الجميع يدرك تأثيره على الشباب و خطورة التدوين تكمن فى انه عالم افتراضى يمكن لنا جميعا العمل به لنشر ما نشاء من أفكار دون الكشف عن هويتنا و من السهل جدا عمل عشرات المدونات فى ساعة واحدة ولذلك فطالما نحن فى هذا العالم فستواجهنا الكثير من التحديات التى لا بد أن نعرف كيف نواجهها و الآن ما هى الطريقة المثلى للتعامل مع مدونة يدعى أصحابها انهم متنصرون و يحاولون النيل من الإسلام ومن رسولنا الكريم وهل يجب أن يكون لنا فكرا مشتركا لمواجهتها أم نترك الأمر كل منا واجتهاده؟؟؟.

من وجهه نظرنا أن من الأفضل أن يكون فى أذهاننا خطة واضحة فى التعامل مع مثل هذه المدونات وسنلخصها لكم

1. اختراق المدونات ليس هو الحل الأمثل فإذا أغلقت واحدة غدا يكون هناك عشرات فما أسهل إنشاء المدونات والطريقة المثلى هى مواجهه الفكر بالفكر والرأي بالرأى والحجة بالحجة و نرجو أن يكون واضحا لكم اننا ندرك حماس الشباب وغيرتهم على دينهم والتى دفعتهم لاختراق المدونة و كل منا يجتهد بما يراه صائبا فنشكر الأخ ماتريكس على اجتهاده وندعو الله أن يكون فى ميزان حسناته

2. نتفق مع ما جاء فى تعليقات الأخوات نهر الحب و maha zein ومجداوية ان من الأفضل أن نتجاهل هذه المدونات وان لا نعطى لها اى اهميه و قد تعمدنا عدم ذكر اسم المدونه المقصودة فى البوست السابق حتى لا نحقق لهم الشهره التى يسعون اليها فى لحظات غضبنا .

3. عدم عمل دعاية لمثل هذه المدونات والامتناع عن ذكر أى معلومات عنها مثل الرابط حتى لا نحقق لهم هدفهم. لا بد أن نعرف ان مثل هؤلاء ليس لديهم الشجاعة لنشر ما يسئ للاسلام بطريقة علنية فلا بد أن يتخفوا وراء اى قناع لكى يجذبوا المسلمين سواء باستفزازنا بعنوان او صورة او موقع كامل او حتى رسالة يطلبوا منا أن ننشرها حتى ينتبه الناس فيتحقق لهم الانتشار المطلوب

4. إذا دخلت أحد هذه المدونات فعليك واجبا وهو إنكار ما تراه والإنكار لا يعنى مطلقا انه عليك أن ترد على كل ما قرأته من شبهات و أفكار تنال من الإسلام وانما يمكنك أن تترك كلمات قليلة تعبر عن استنكارك أو تكتفى بالإنكار بالقلب

5. إذا كنت ممن لديهم علما شرعيا كافيا فعليك واجب الرد عليهم إذا كنت واثقا من معلوماتك ومن الأفضل أن تتبع المنهج العلمى فى الرد على أن يكون موثقا بالمراجع قدر الإمكان حتى تقطع عليهم الإيحاء بأن ما تقول هو اجتهاد شخصى فنحن لنا مرجعية أساسية وهى الكتاب والسنة ثم أقوال العلماء

6. إذا قرأت أحد الشبهات عن الإسلام وداخلت قلبك ففى هذه الحالة اعلم انه عليك واجب تجاه نفسك وهو أن تسأل عنها أحد العلماء الثقات ولا تخجل من السؤال لأنك لا تدرى لو ظلت بداخلك الى أين تأخذك ومعظم النار من مستصغر الشرر وعدم العلم ليس شيئا نخجل منه ولا يتعلم العلم مستحى ولا متكبر فلا تكون منهم

7. لا تشعر أبدا بالذنب لأنك لا تستطيع أن ترد على بعض ما يقولون ولا تحزن لما ترى وانما اجعل ما ترى حافزا لك لكى تتعلم دينك فلقد مّن الله عليك بأن ولدت مسلما فليس أقل من أن تشكر نعمة الله بأن تتعلم المزيد من دينك فحاول حضور بعض دروس العقيدة والتوحيد وتأكد أنك ستزداد شعورا بنعمة الإسلام وستزداد حبا له وستعرف ان هناك فرقا كبيرا بين أن تكون مسلما بالمولد وأن تكون مسلما فعليا يدرك معنى وقيمة هذا الدين

8. أوذى رسول الله صلى الله عليه وسلم وبذل الكثير من أجل أن نكون مسلمين فجزاه الله خيرا عن أمته وخير ما تفعله لرسولك هو أن نقتدى به وان تكون مثالا للمسلم بالأفعال وليس بالكلمات

9. لا بد أن ننتبه أن ما يحدث يمكن أن يكون نوع من انواع الفتنه لفئة من مصلحتها إشعال نار الفتنه بين المسلمين و المسيحيين بمنطق فرق تسد ويجب ألا نعطيهم الفرصة و لا بد أن نتذكر دائما ان اى خلاف بنا سيفصل فيه الرحمن يوم القيامه لكننا فى وطننا هذا يجب ان نحيا اخوه متحابين ما دام كل منا يحترم الأخر و لا يقترب من منطقة الخطر ألا وهى الدين لأننا كثيرا ما نتكلم بغير علم ولا حجه و بتكون النتيجه ضدنا أو فرقه و مشاعر من الكره نحن فى غنى عنها

نرجو منكم مراجعة هذا البوست لموناليزا
http://monaliza110.blogspot.com/2008/03/blog-post_21.html

كما نود أن نشير إلى حملة " حبا فى رسول الله" كمثال قوى يدل على الإيجابية فى نصرة هذا الدين. فجزاهم الله خيرا لما يبذلونه من مجهود

فى انتظار تعليقاتكم مع كل احترامنا لكل الآراء المتفقة أو المختلفة معنا

وكل عام وأنتم إلى الله أقرب

روفى. جنة. موناليزا

بسم الله الرحمن الرحيم .... الرساله الاولى ....

2008-07-23T00:55:00.008+03:00

جاءتنا هذه الرساله من احدى الاخوات الكريمات قابلتها هذه المشكله و لانها ليست مشكله خاصه رأينا ان ننسخها لكم كما هى لتعطونا ارائكم جميعا ....

السلام عليكم ورحمه الله وبركاته

اولا الف مبروك علي المدونه الي بجد كلنا محتاجينها وحظي بقي اني اكون اول موضوع افتحه اوشتكي منه بمعني اصح كنت بتصفح احدي المدونات ولفت نظري تعليق من مليون مرة مكتوب نداء لكل مسلم دخلت المدونه ويا ريتني مكنت دخلت اتحرق دمي من الي قريته جماعه بيقولو علي نفسهم المستنصريين بالله بيدعو لترك الاسلام والدخول في دين النصارهبيقولو انهم كانو مسلمين واهتدو الي الدين المسيحي وبيدعو اي حد انه يدخل معاهم ويقرب من الرب يسوع انا اتجننت لانهم مش بس كدا دول بيزمو في الرسول الحبيب عليه الصلاة والسلام وبيقولو عليه كلام محدش من المسلمين يقدر يسكت عليه وكمان مش بيتناقشو لا دول بيهجمو ويغلطو في المسلمين والرسول عليه الصلاة والسلام انا رايي اننا كل مسلم وكل مسلمه لازم تجمع معلومات من مواقع معروفه ومعروف مصداقيتها عشان نرد علي الناس دي الي ميعرفوش دين الله ولا امه سيدنا محمد وهما ضعاف النفوس واسمحولي اوجه دعوه لكل المسلمين اننا نتوحد في بوست جماعي ننشر فيه معلومات عند ديننا الحقيقي ونعرف الناس دي الحقيقه عشان مش اي حد يستجري يكلم عن الاسلام والمسلمين كلمه وحشه
هستني رد فعل كل المسلمين يا ريت نتحد عشان ربنا يكتبها في ميزان حسناتنا ورسولنا يرضا عنا

اشهد ان لا اله الا الله واشهد ان سيدنا محمد عبد الله و رسوله وخاتم الانبياء والمرسلون

انتهت الرسالة.............

و سننتظر ارائكم و تعليقاتكم و المناقشه مفتوحه للجميع و سنعطيكم خلاصه ارائنا بعد الاستماع لارائكم اولا ..

افتح قلبك وفضفض مع روفى وجنة و موناليزا

2008-07-09T20:57:00.005+03:00

محتاج صديق مخلص تفتحله قلبك وتفضفض معاه من غير خوف ولا حواجز؟

حاسس ان الدنيا سوده فى عنيك ومش شايف بريق أمل؟

او محتار فى قرار ومحتاج عقل و قلب يفكر معاك و يساعدك و يأخذ بأيدك وسط زحمه افكارك ؟

محتاج تتكلم ومش لاقى حد يسمعك؟

محتاج حد يقولك قول كمان انا هسمعك؟

محتاج حد يفتحلك قلبه وعقله من غير شروط ؟

احنا معاك وقلوبنا مفتوحه وادينا ممدودة بتقولك تعال قرب اتكلم واحكى وفضفض

كل همنا نأخذ بأيدك لبر الامان .... احساسنا بيك احساس انسان بإنسان

مش مهم جنسك او لونك او انت مين .... المهم يا صاحبى انك إنسان ..

محتاج لانسان يحس بيك ويفهمك من غير ما يلومك او كلامه يألمك

انا كمان حاحتاج لك اكيد وساعتها لازم و اكيد حتمد لى الايد ..

صحيح بينا آميال لكن ما فيش حاجة هتمنعنى عنك
لو محتاجلى فى يوم اكيد حتلاقينى .. بس انت اتكلم من غير لا خوف ولا خجل ..
اخواتنا و احبائنا فى الله .. المدونه دى علشانكم انتم .. و مش حتكون غير بمشاركتكم ..
اى حد عاوز رأينا او مساندتنا يراسلنا على الميل و احنا مش حنقول مين صاحب المشكله الا لو صاحب المشكله سمح

مع بعض بسم الله حنبدأ مشوارنا وان شاء الرحمن يعينا و يقدرنا ..

وفى الاخر عارفين هدفنا ايه

عايزين نتقابل على باب الجنة

ومحدش فينا يتأخر

مافيش احلى من الصحبة الصالحة

احنا بنحاول نكون منهم وانتو كمان حاولوا معانا

علشان نكون أحلى صحبة تتقابل فى أحلى مكان

فى انتظار أرائكم واقتراحتكم و يا رب الفكره تكون عجبتكم

جنه و روفى فى انتظاركم

بجد بنحبكم فى الله

----------------------------------------------------------------------------

لمن يرغب فى ارسال مشكلته أو عايز يفضفض معانا أو يحب يشركنا فى أفكاره

تقدروا تبعتوا على الايميل التالى

rovy_gannah@yahoo.com

مع تحديد رغبتك فى النشر من عدمه وتأكد اننا سنراعى السرية التامة

وسنراعى حذف التفاصيل التى قد لا ترغب فى نشرها